ابراز آمادگی تاجیکستان برای اعمار بند آب در افغانستان

به دنبال دیدار وزیر امور خارجه تاجیکستان با سرپرست وزارت امور خارجه کشور در دوشنبه، جانب تاجیکستان ابراز آمادگی کرده است که در بخش اعمار بندهای آب با همکاری با افغانستان است.

به گزارش خبرگزاری دید، حنیف اتمر سرپرست وزارت امور خارجه در سفری به تاجیکستان با سراج‌الدین مهرالدین وزیر امور خارجه این کشور دیدار و گفت‌وگو کرد.
در این دیدار، اتمر موضع‌گیری تاجیکستان را در حمایت از موقف افغانستان در خصوص صلح و مذاکرات با طالبان ستود و گفت: صلح افغانستان، صلح منطقه است و ما خواهان رسیدن به صلحی هستیم که در نتیجهٔ آن ارزش‌ها و دستاوردهای نظام جمهوری حفظ و تقویت شود و طالبان به ارادهٔ آزاد مردم افغانستان احترام گذارند.
سرپرست وزارت خارجه همچنین ابراز داشت که دو کشور می‌توانند در دو سطح ملی و ولایتی باهم کار کنند و برنامهٔ مشترک امنیتی را در چارچوب همکاری‌های استراتژیک طرح و عملی سازند.
اتمر گفت:‌ ما خواهان گسترش روابط فرهنگی میان دو کشور هستیم و این پیوندها را می‌توان از راه برگزاری هفته‌های فرهنگی، تجلیل از شخصیت‌های فرهنگی دو کشور و زمینه‌سازی برای آموزش محصلان افغانستان در تاجیکستان در مقاطع مختلف گسترش داد.
سرپرست وزارت امور خارجه بیان کرد که افغانستان خواهان خریداری برق بیشتر از تاجیکستان می‌باشد و به این منظور رییس برشنا موسسه در این سفر حضور دارد تا با همتایان تاجیک خود صحبت کند.

سراج‌الدین مهرالدین وزیر امور خارجه تاجیکستان نیز در این دیدار از آغاز مذاکرات صلح افغانستان استقبال کرد و از حمایت کشورش از روند صلح به رهبری و مالکیت افغان‌ها اطمینان داد.
مهرالدین گفت: تاجیکستان تجربهٔ کافی در اعمار بندهای آب دارد و آمادهٔ همکاری با افغانستان در این خصوص می‌باشد.
وزیر خارجهٔ تاجیکستان در پیوند به سفر رییس‌ جمهور تاجیکستان به مرز و گفت‌وگو با مردم دروازها، تهدیدات مشترک تروریستی، مشکل قاچاق در امتداد سرحدات و نیاز به اقدام مشترک، نیز بحث‌های همه‌جانبه داشت و اطمینان داد که تاجیکستان از مبارزهٔ افغانستان علیه تروریزم و جرایم سازمان‌یافته حمایت می‌کند.
همچنین، حمایت تاجیکستان از عضویت کامل افغانستان در سازمان همکاری‌های شانگهای و سازمان امنیت و همکاری اروپا و فارمت‌های منطقه‌‌ای، برگزاری نشست‌های مشورت‌های سیاسی، توسعهٔ همکاری ترانسپورتی و ترانزیتی، احداث خط‌آهن پنج جانبه (چین، افغانستان، تاجیکستان، قرقیزستان و ایران)، انتقال محموله‌های کمک‌های بشری از طریق خاک تاجیکستان به بدخشان افغانستان، استرداد محبوسین، ایجاد کمیسیون همکاری‌های امنیتی میان دو کشور و ایجاد یک راهکار جامع و موثر منطقه‌‌ای برای مبارزه با تروریزم، از موضوعات عمدهٔ بحث و تبادل نظر میان وزیران خارجه دو کشور بود.