تاجیکستان ۲۰ هزار نیروی مسلح در مرز با افغانستان مستقر می‌کند
خبرگزاری دید: همزمان با افزایش جنگ در حوزه شمال شرق کشور، تاجیکستان اعلام کرده که ۲۰ هزار نیروی نظامی در مرز با افغانستان مستقر می‌کند. این تصمیم را امام‌علی رحمان رییس جمهور تاجیکستان در جلسه شورای امنیت ملی تاجیکستان اتخاذ کرده است.
این جلسه روز گذشته (دوشنبه ۱۴ سرطان) برگزار شده است. در این جلسه در مورد تقویت حفاظت از مرز و اعزام نیروهای اضافی به مناطق ضروری در مرز با افغانستان تصمیم گرفته شده است.
در جلسه شورای امنیت ملی تاجیکستان، رجبعلی رحمان علی فرمانده نیروهای مرزی و رمضان رحیم‌زاده وزیر داخله آن کشور درباره وضعیت در مرز تاجیکستان با افغانستان گزارش داده‌اند.
رییس جمهور تاجیکستان در جلسه شورای امنیت ملی به وزیر دفاع این کشور هدایت داده است تا ۲۰ هزار نیروی ذخیره را به نقاط مرزی با افغانستان مستقر کند.
این درحالی است که در هفته‌های اخیر طالبان در شماری از ولایات در شمال و شمال‌شرق کشور پیش‌روی داشته‌اند. پیش‌روی طالبان نگرانی شماری از کشورهای آسیای میانه از جمله تاجیکستان را در پی داشته است.
به دنبال حملات طالبان، صدها نیروی امنیتی به تاجیکستان عقب‌نشینی کرده‌اند. شمار این نیروها از سوی رسانه‌های تاجیکستانی بیش از یک‌هزار و ۵۰۰ نفر گفته شده است.
