وزارت امور خارجه کشور از دیدار معین سیاسی این وزارت با همتای تاجیکش در شهر دوشنبه پایتخت جمهوری تاجیکستان خبر داد.

به گزارش خبرگزاری دید، میرویس ناب معین سیاسی وزارت امور خارجه در سفرش به تاجیکستان با همتای تاجیکش آقای خسرو ناظری ملاقات و پیرامون موضوعات مورد علاقه تبادل نظر کرد.
وزارت خارجه در اعلامیه‌ای گفت: هر دو‌جانب راجع به آمادگی‌های نهمین کنفرانس وزرای خارجه قلب آسیا – پروسۀ استانبول تبادل نظر نموده، برگزاری این کنفرانس را در تقویت اجماع منطقه‌‌ای و بین‌المللی برای حمایت از گفت‌وگو‌های صلح افغانستان مهم خواندند.
دو طرف همچنین پیرامون نهایی‌سازی موافقت‌نامه‌های دوجانبه میان کابل و دوشنبه تا قبل از برگزاری نهمین کنفرانس قلب آسیا – پروسۀ استانبول صحبت نموده، امضای این موافقت‌نامه استراتژیک را در گسترش روابط میان دولت‌ها و مردمان دو کشور مهم و ارزنده خواندند.
گفتنی است که در روزهای اخیر رییس مجلس نمایندگان کشور نیز به تاجیکستان رفته و با مقامات آن کشور دیدار داشته است.

کد خبر: 86383