رییس‌جمهور به تاجیکستان رفت
محمد اشرف غنی، رییس‌جمهور کشور صبح امروز در رأس یک هیات بلند رتبۀ دولتی به منظور اشتراک در دومین نشست سران کشورهای «پروژه کاسا یک هزار» عازم دوشنبه پایتخت تاجیکستان شد.
به گزارش خبرگزاری دید، به نقل از صفحه فیس‌بوک ارگ، رییس جمهور غنی در این سفر یک روزه برعلاوۀ اشتراک و سخنرانی در نشست متذکره، با امام علی رحمان، رییس جمهور تاجیکستان روی گسترش بیشتر روابط میان دو کشور، دیدار و گفت‌وگو خواهد کرد.
او هم‌چنان در نشست سه‌جانبه سران کشورهای افغانستان، تاجیکستان و پاکستان اشتراک کرده و از نمایشگاه محصولات زراعتی و مواد غذایی جمهوری تاجیکستان دیدن خواهد کرد.
هم‌چنان رییس جمهور غنی با نواز شریف، صدراعظم پاکستان قرار است در حاشیه این نشست دیدار و گفت‌وگو کنند.
در این سفر او را اکلیل حکیمی، وزیر مالیه، عبدالستار مراد، وزیر اقتصاد، داکتر محمدهمایون قیومی، مشاور ارشد رییس جمهور در امور زیربناها، محمدشاکر کارگر، نماینده خاص رییس جمهور در امور کشورهای آسیای میانه و شاه‌زمان میوندی، مشاور ارشد رییس جمهور در امور روابط عامه و ارتباطات استراتیژیک همراهی می‌کنند.
