عمران خان نخست‌وزیر پاکستان می‌گوید که بعد از دیدار با رهبران کشورهای همسایه افغانستان، گفت‌وگو در باره تشکیل یک حکومت همه‌شمول، شامل تاجیک‌ها، هزاره‌ها و ازبیک‌ها را با طالبان آغاز کرده است.


به گزارش خبرگزاری دید، عمران خان نخست‌وزیر پاکستان امروز شنبه(۲۷ سنبله) در توییتی گفت که مذاکرات با طالبان را برای تشکیل یک حکومت همه‌شمول در افغانستان آغاز کرده است.
عمران خان: پس از نشست‌ها با رهبران همسایه افغانستان، به‌ویژه گفت‌وگوی طولانی با امام علی رحمان رییس جمهور تاجیکستان، من گفت‌وگو با طالبان را برای تشکیل یک حکومت همه‌شمول که شامل تاجیک‌ها، هزاره‌ها و ازبیک‌ها باشد، آغاز کرده‌ام.
وی افزود: بعد از ۴۰ سال درگیری، این همه‌شمولیت صلح و ثبات افغانستان را تأمین می‌کند که نه تنها به نفع افغانستان، بلکه به نفع منطقه نیز می‌باشد.
گفتنی است که رهبران کشورهای عضو شانگهای به دلیل همه‌شمول نبودن دولت طالبان، با شرکت نمایندگان آنان در این نشست مخالفت کردند.

کد خبر: 96615