عبدالله رییس شورای عالی مصالحه ملی در واکنش به فهرست اعضای شورای مصالحه ملی، گفته که ایجاد شورای عالی مصالحه ملی از صلاحیت‌های رییس این شورا است و ایجاب فرمان ریاست جمهوری را نمی‌کند.

به گزارش خبرگزاری دید، عبدالله عبدالله رییس شورای عالی مصالحه ملی با نشر اعلامیه‌ای در صفحه فیسبوک خویش گفته که به اساس موافقت‌نامۀ سیاسی ۲۸ ثور سال روان خورشیدی، «رییس شورای عالی مصالحه‌ ملی در مشوره با رییس جمهور، طرف‌ها و رهبران سیاسی، رؤسای مجلسین شورای ملی، جامعه‌‌ مدنی و نخبگان کشور، این شوری را تشکیل می‌دهد.»
آقای عبدالله همچنان تصریح کرده است که ایجاد این شوری از صلاحیت‌های رییس شورای عالی مصالحه‌ ملی می‌باشد و ایجاب فرمان مقام محترم ریاست جمهوری را نمی‌کند.
شامگاه روز شنبه (۸ سنبله) فهرست اعضای شورای عالی مصالحه ملی از نشانی ریاست جمهوری نشر شد. به محض همگانی شدن این فهرست، شماری از رهبران سیاسی که نام‌شان در آن درج است، از عضویت خود در شورای عالی مصالحه ملی انصراف دادند. حامد کرزی، رییس‌جمهور سابق کشور، صلاح‌الدین ربانی و گلبدین حکمتیار از کسانی بودند که عضویت‌شان را از این شورا متنفی اعلام کردند.

کد خبر: 74422