از روند صلح افغانستان همه جانبه حمایت می‌کنیم

رییس شورای عالی مصالحه ملی در سفرش به شهر دوشنبه، با امام‌ علی رحمان رییس‌ جمهور تاجیکستان دیدار و در باره روند صلح افغانستان گفت‌وگو کرده است.

به گزارش خبرگزاری دید، شورای عالی مصالحه ملی در خبرنامه‌ای گفته است که عبدالله عبدالله رییس این شورا پیش از ظهر امروز سه‌شنبه(۲ جدی) با امام‌ علی رحمان رییس ‌جمهور تاجیکستان ملاقات کرده است.
امام ‌علی رحمان در گفت‌وگو با عبدالله ابراز امیدواری کرده که تلاش‌های صلح در افغانستان نتیجه بدهد.
او افغانستان را از دوستان و متحدان نزدیک تاجیکستان خوانده و تاکید کرده‌است: این روابط ریشه در همسایگی، مشترکات تاریخی، فرهنگی و دینی دارد.
امام‌ علی رحمان با اعلام حمایت همه‌جانبه‌ کشورش از تلاش‌های صلح در افغانستان، صلح و ثبات در افغانستان را صلح و ثبات در تاجیکستان، منطقه و فراتر از منطقه عنوان کرده است.
او افزوده که افغانستان، تاجیکستان و منطقه از دهشت‌افگنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینه‌ گسترش و توسعه‌ تجارت در منطقه و اتصال آسیای مرکزی به جنوب آسیا را فراهم می‌کند.
در این دیدار، همچنان عبدالله عبدالله گفته است که دولت افغانستان در مذاکرات صلح به دست‌یافتن به صلح پایدار، عادلانه، باعزت و با حفظ ارزش‌های جمهوریت متعهد است.
او ضمن تاکید بر تامین آتش‌بس در جریان مذاکرات صلح، گفته که افزایش خشونت و جنگ یکی از نگرانی‌های حکومت و مردم افغانستان است.
عبدالله در سفرش به تاجیکستان، روز گذشته با صدر اعظم و رییس مجلس نمایندگان تاجیکستان نیز در مورد روند صلح افغانستان گفت‌وگو کرده بود.
اخیراً، نگرانی در باره ظهور طالبان تاجیک در مناطق شمال ‌شرق کشور افزایش یافته است. این جنگجویان در ماه گذشته در ولسوالی مایمی بدخشان دست‌ کم ۲۵ نیروی دولتی را کشتند.