افغانستان موضوع رایزنی وزرای خارجه تاجیکستان و هنگری

خبرگزاری دید: پتر سییرتو وزیر خارجه هنگری با سراج‌الدین مهر‌الدین همتای تاجیکستانی خود در مورد وضعیت افغانستان گفتگو کرده‌است.
او از دولت تاجیکستان برای بسته نگهداشتن مرزش به روی پناهجویان افغان اظهار سپاس کرده است. پتر سییرتو که به منظور شرکت در یک همایش منطقه‌ای «صندوق بین‌المللی نجات آرال» به تاجیکستان سفر کرده با سراج‌الدین مهر‌الدین در شهر دوشنبه دیدار و گفت‌وگو کرده‌است.
او بعد از پایان دیدارش، به خبرنگاران گفت که وضعیت منطقه، بخصوص تحولات اخیر افغانستان محور گفت‌وگوها بوده است.
آقای سییرتو گفته است که با وجود فشار سازمان‌های بین‌المللی، تاجیکستان مرز خود را به روی پناهجویان افغان باز نکرده و به این ترتیب از «ایجاد یک نقطه نو مهاجرت به اروپا پیشگیری» کرده است.

آقای سییرتو گفت: «بسیار مهم است که آسیای میانه‌ به اسارت تروریزم نیفتد و از موج تازه مهاجرت از این منطقه به اروپا پیشگیری شود».
وزیر خارجه هنگری از سیاست‌های اتحادیه اروپا در قبال افغانستان و همسایگانش به شدت انتقاد کرده‌است.
او گفت که مقامات اتحادیه اروپا در بروکسل مانع شامل کردن موضوع تعیین سهمیه کشورها برای پذیرش پناهجویان در کشورهای گوناگون شدند.
او همچنین از کشورهای عضو اتحادیه اروپا انتقاد کرد که به گفته او «اصلاً به کشورهای همسایه افغانستان توجه نمی‌کنند».
او همکاری جدی و قابل توجه به کشورهای همسایه افغانستان را مهم خواند تا آنها بتوانند مرز خود با افغانستان را تحکیم ببخشند.
تاجیکستان همسایه شمالی افغانستان ماه گذشته اعلام کرد که تا زمانی‌که کمک‌های مالی بین‌المللی دریافت نکند‌، نمی‌تواند پذیرای تعداد زیادی پناهنده باشد.