امام‌علی رحمان رییس جمهور تاجیکستان در نهمین دور نشست قلب آسیا-روند استانبول گفت که بحران افغانستان خصوصیت فرامنطقهای دارد و منطقه نباید این کشور را با مشکلات تحمیل‌شده تنها بگذارد.
به گزارش خبرگزاری دید، امام‌علی رحمان رییس جمهور تاجیکستان امروز سه‌شنبه(۱۰ حمل) در آغاز نشست قلب آسیا-روند استانبول گفت که درد شهروندان افغانستان، درد خلق تاجیک است و کشورش برای حل بحران افغانستان قدم‌های موثر بر می‌دارد.
امام‌علی رحمان گفت: درد شهروندان افغانستان درد خلق تاجیک است. ما برای حل بحران افغانستان قدم‌های موثری را خواهیم برداشت. تاجیکستان خواستار برقراری صلح در افغانستان است و همکاری با افغانستان در اولولیت سیاست خارجی تاجیکستان قرار دارد.
وی با بیان این که تاجیکستان آماده است برای تطبیق پروژه‌های اساسی با افغانستان همکاری کند، افزود: تجربه‌های چهل سال جنگ در افغانستان بیان‌گر آن است که بحران افغانستان، راه حل نظامی ندارد.
رییس جمهور تاجیکستان در مورد جنگ افغانستان بیان داشت: قضیه افغانستان خصوصیت فرامنطقهای داشته و کشورهای منطقه نباید افغانستان را با این مشکلات تحمیل‌شده تنها بگذارند.
وی در ادامه افزود: روند آشتی ملی در کشور ما پنج سال طول کشید. هزاران شهروند ما در افغانستان اقامت گزیدند. در همان روزها پروفیسور استاد برهان‌الدین ربانی و آمر صاحب احمدشاه مسعود خدمت تاریخی کردند و نخستین مذاکرات بین تاجیکان در کابل برگزار شد.
گفتنی است که نهمین دور نشست وزرای خارجه کشورهای عضو قلب آسیا-روند استانبول امروز در دوشنبه با سخنرانی رییس جمهور غنی و رییس جمهور تاجیکستان آغاز شد.
