خبرگزاری دید: والی بلخ می‌گوید که هیچ نیروی مرزی افغانستان از ولسوالی کلدار به تاجیکستان فرار نکرده است. پیش از این برخی گزارش‌ها منتشر شده بود مبنی بر اینکه شماری از مرزبانان افغانستان به تاجیکستان پناه برده‌اند.
فرهادعظیمی والی بلخ امروز سه‌شنبه (۸ سرطان) در یک نشست خبری گفت که هیچ نیرویی از افغانستان به تاجیکستان فرار نکرده و نه هم زمینه فرار آنها فراهم شده است.
به گفته او، شماری از نیروها به بندر حیرتان عقب‌نشینی کرده بودند که دوباره در موقعیت‌های اصلی‌شان جا به جا شده‌اند.
پیشتر خبرگزاری دولتی تاجیکستان – خاور گزارش کرده بود که ۱۷ نفر از نیروهای مرزی افغانستان پس از آن که نتوانستند در برابر حملات طالبان در روستای چک چک ولسوالی کلدار ولایت بلخ مقاومت کنند، از طریق پاسگاه شهرتوس وارد تاجیکستان شده‌اند.
خبرگزاری خاور به نقل از بیانیه نیروهای مرزی تاجیکستان همچنین گفته است که این نیروها روز گذشته وارد تاجیکستان شده و نیروهای مرزی تاجیکستان با درنظرداشت روابط خوب بشردوستانه و حسن همجواری، به نیروهای مرزی افغانستان اجازه ورود داده‌اند.
