چین یک میلیون دوز واکسین کرونا به افغانستان کمک می‌کند
ارگ ریاست جمهوری اعلام کرد که قرار است جمهوری خلق چین یک میلیون دوز واکسین کرونا به افغانستان کمک کند.
به گزارش خبرگزاری دید: ریاست‌جمهوری در اعلامیه‌ای گفته است که محمد اشرف غنی، رییس‌جمهور کشور، ظهر روز گذشته جمعه (۲۵ سرطان) با شی جین پینگ، رییس‌جمهوری چین تیلفونی گفت‌وگو کرده است.
در خبرنامه ارگ آمده است که رییس جمهور چین در این گفت‌وگو بر ادامه همکاری‌های اقتصادی و پروژه‌های مشترک با افغانستان تاکید کرده و گفته است که کشورش یک میلیون دوز واکسین کرونا نیز به افغانستان کمک می‌کند.
این در حالی‌است که در چند ماه اخیر شمار مبتلایان و قربانیان کرونا در افغانستان افزایش یافته است.
از سویی هم، شی جین پینگ در این گفت‌وگوی تیلفونی از همکاری کشورش در عرصه‌های امنیت، توسعه اقتصادی، پروسه صلح و صحت اطمینان داده و تاکید کرده است که چین از روند صلح افغانستان در راستای مبارزه با تروریزم حمایت می‌کند.
رییس جمهوری چین همچنین از طالبان خواسته است که از خشونت دست کشیده و صلح در افغانستان را بپذیرند.
از سویی هم رییس‌جمهور اشرف غنی نقش چین را در روند صلح افغانستان ارزشمند عنوان کرده و از حمایت این کشور در زمینه صلح قدردانی کرده است.
