تاجیکستان: قاچاق مواد مخدرازافغانستان کاهش نیافته است

خبرگزاری دید: آژانس کنترول مواد مخدر ریاست جمهوری  تاجیکستان گفته است به‌رغم ادعاها مبنی بر ممنوعیت تولید مواد مخدر غیرقانونی، هیچ کاهشی در حجم قاچاق مواد مخدر از افغانستان ثبت نشده است.

بر اساس گزارش دفتر مبارزه با مواد مخدر و جرایم سازمان ملل، کشت خشخاش و تولید تریاک درافغانستان ۹۵ درصد کاهش یافته است، با این حال مواد افیونی مانند هروئین و تریاک و همچنین مت‌آمفتامین‌های ساخت افغانستان همچنان به تاجیکستان سرازیر می‌شود.

مرکز کنترول مواد مخدر تاجیکستان می‌گوید: دلیل این امر این است که تولیدکنندگان مواد مخدر افغانستان سود بیشتری از تولید مت‌آمفتامین به دست می‌آورند.

این مرکز خاطرنشان کرده است: بر اساس گزارش‌های اخیر، آزمایشگاه‌های مخفی مواد مخدر مصنوعی در افغانستان برای تولید این مواد آغاز به کار کرده است که به تاجیکستان قاچاق و سپس به کشورهای دیگر منتقل می‌شود.

این آژانس تصریح می‌کند که بیش از ٢.٥ تن مواد غیرقانونی در مناطقی از تاجیکستان در مرز افغانستان در سال ٢٠٢٣ کشف و ضبط شد که بیش از نیمی از کل مواد مخدر کشف شده در این کشور آسیای مرکزی در سال گذشته را تشکیل می‌دهد.

این در حالی است که مقامات حکومت سرپرست به تازگی از تخریب هزاران جریب زمین خشخاش در ولایت‌های کشور خبر دادند.