دیدار وزیر خارجه پاکستان با مقامات تاجیکستان در باره تحولات افغانستان
وزیر امور خارجه پاکستان در سفرش به تاجیکستان با امامعلی رحمان رییس جمهور و سراج الدین مهرالدین همتای تاجیکستانی‌اش پیرامون تحولات افغانستان تبادل نظر کرد. محمد صادق نماینده ویژه پاکستان در امور افغانستان قریشی را در این سفر همراهی می‌کرد.
به گزارش خبرگزاری دید، شاه محمود قریشی وزیر امور خارجه پاکستان در سفرش به دوشنبه امروز چهارشنبه(٣ سنبله) در چند رشته توییت گفت که با وزیر خارجه و رییس جمهور تاجیکستان ملاقات کرده است.
روابط دوجانبه و تحولات اخیر در افغانستان محور این سفر گفته شده است.
قریشی در توییتی نوشت: در باره آخرین تحولات در افغانستان گفت‌وگو کردم و دیدگاه پاکستان را در مورد حمایت از یک راه‌حل فراگیر سیاسی با جانب تاجیکستان شریک ساخته و امیدوارم رهبران افغانستان به آن دست یابند.
وی همچنین گفت که اسلام‌آباد به دنبال همکاری با تاجیکستان در پاسخ هماهنگ نسبت به تحولات در افغانستان و صلح، ثبات و اتصال منطقه‌ای می‌باشد.
وزیر خارجه پاکستان در دیدار با امامعلی رحمان رییس جمهور تاجیکستان ضمن تشریک پیام عمران خان نخست‌وزیر این کشور، دیدگاه پاکستان را در قبال افغانستان با وی در میان گذاشته است.
گفتنی است که قریشی قرار است به ازبیکستان، ترکمنستان و ایران نیز سفر کند.
