ممانعت طالبان از برگزاری مراسم عروسی در هوتل‌های ولایت سرپل
شماری از خانواده‌ها می‌گویند که مخالفان مسلح دولت به آن‌ها هشدار دادند که اگر مراسم عروسی‌شان را در هوتل‌های شهر سرپل برگزار کنند، کشته خواهند شد.
به گزارش خبرگزاری دید، به نقل از رادیو آزادی، در این اواخر مخالفان مسلح دولت هشدار دادند که خانواده‌ها دیگر نباید در هوتل‌های شهر سرپل مراسم عروسی‌شان را برگزار کنند.
به گفته این خانواده‌ها، مخالفان مسلح دولت با پخش اطلاعیه‌ها در شهر چندین‌بار تهدید کرده‌اند که اگر مراسم عروسی‌شان را در هوتل‌ها تجلیل کنند کشته خواهند شد.
تاج محمد خراسانی، یک تن از اعضای جامعه مدنی سرپل می‌گوید: بیشتر از یک ماه می‌شود که دروازه‌های هوتل‌های خصوصی سرپل به روی مراجعین بسته است.
گفتنی است، مردم به خاطر این تهدیدات بسیار نگران‌اند و به همین دلیل مراسم عروسی‌شان را در مزارشریف یا در شبرغان تجلیل می‌کنند، در حالی‌که مصارف رفت‌وآمد راه چندین مرتبه بلند می‌شود.
