رییس جمهور تاجیکستان: نگران وضعیت افغانستان و فلسطین هستیم
خبرگزاری دید: رییس جمهور تاجیکستان در سخنانی از وضعیت موجود در افغانستان و فلسطین به شدت ابراز نگرانی کرده است.
امامعلی رحمان از جامعه جهانی خواسته درگیری در کشورها را از طریق مذاکره و گفت‌وگو حل کند.
امامعلی رحمان اخیراً در مجلس نمایندگان تاجیکستان درباره سیاست داخلی و خارجی کشورش سخنرانی کرده و یک نسخه از متن این سخنرانی در وبسایت ریاست جمهوری تاجیکستان منتشر شده است.
در سخنرانی آقای رحمان بدون آنکه توضیح بیشتری داده شود، از وضعیت کنونی افغانستان ابراز نگرانی شده است.
او در دو سال گذشته در نشست‌های منطقه‌ای و بین‌المللی بارها تاکید کرده که باید در افغانستان «حکومتی دموکراتیک و فراگیر با مشارکت همه اقوام» تشکیل شود.
قاچاق اسلحه، مواد مخدر و تلاش نفوذ افراط‌گرایان از افغانستان به تاجیکستان و آسیای میانه از دیگر نگرانی‌های دوشنبه است.
امامعلی رحمان تاکید کرده که تاجیکستان با همه سازمان‌های بین‌المللی و منطقه‌ای از جمله سازمان ملل، کشورهای مستقل مشترک‌المنافع، سازمان همکاری شانگهای، سازمان همکاری اسلامی، سازمان همکاری اقتصادی، سازمان پیمان امنیت جمعی، سازمان امنیت و همکاری اروپا و سایر نهادها برای حل مسایل همکاری می‌کند.
او در بخشی دیگر از پیام خود گفته است که تاجیکستان می‌خواهد در آینده‌ای نزدیک تعدادی از پروژه‌های ترانزیتی بین‌المللی و منطقه‌ای را به بهره‌برداری بسپارد.
به گفته امامعلی رحمان، یکی از این پروژه‌ها دهلیز اقتصادی ترانزیتی چین – تاجیکستان – افغانستان است که در آینده نزدیک مورد استفاده قرار خواهد گرفت.
