روند صلح و رایزنی عبدالله با مقامات ازبیکستان

عبدالله عبدالله رییس شورای عالی مصالحۀ ملی که در رأس هیئتی به ازبیکستان سفر کرده است، با مقامات بلندپایه آن کشور در رابطه به مذاکرات صلح دوحه، تجارت، فرصت‌های سرمایه‌گذاری و روابط دوجانبه بحث و تبادل نظر کرد.

به گزارش خبرگزاری دید، عبدالله عبدالله رییس شورای عالی مصالحۀ ملی در سفرش به ازبیکستان امروز دوشنبه(۲۱ عقرب) با عبدالعزیز کاملوف وزیر خارجه و معاون نخست‌وزیر ازبیکستان در امور تجارت و سرمایه‌گذاری ملاقات کرد.
آقای عبدالله در چند رشته توییت گفته است که در دیدار با آقای کاملوف، در مورد روند صلح، مذاکرات میان‌افغانی در دوحه و روابط دو کشور گفت‌وگو کرده است.
رییس شورای عالی مصالحه ملی در دیدار جداگانه با معاون نخست‌وزیر ازبیکستان و وزیر سرمایه‌گذاری و تجارت خارجی آن کشور نیز در رابطه به تجارت و سرمایه‌گذاری رایزنی کرد.

عبدالله عبدالله در ادامه سفرهایش به کشورهای منطقه، شام روز گذشته کابل را به مقصد تاشکند ترک کرد.